Ballkani dhe Cluj do të përballen në ndeshjen e parë të Grupit G në Ligën e Konferencës.
Për suharekasit është hera e parë në histori që marrin pjesën në një garë evropiane, derisa Cluj edhe më parë ka luajtur në garat evropiane, derisa edicionin e kaluar ishte në grupet e Ligës së Konferencës.
Takimi i parë mes dy ekipeve do të zhvillohet në stadiumin ‘Fadil Vokrri’ në Prishtinë me fillim nga ora 18:45.
Mysafirët janë favorit në letër për faktin se kanë përvojë më të madhe në garat evropiane dhe janë më lart në ranglistën e UEFA-s.
Vlera e skuadrave
Dallimi në vlerën e dy skuadrave në faqen e specializuar për vlerësimin e futbollistëve ‘Transfermarkt’ është shumë i madh.
Kampioni në fuqi i Kosovës ka një vlerë totale prej 4,18 milionë euro nga me 27 futbollistë në total.
Ndërkohë vlera e ekipit rumun është shtatë herë më e lartë se sa ajo e ekipit kosovar.
Cluj ka në radhët e veta 34 futbollistë që kanë vlerë të përbashkët prej 29 milionë eurove.
Futbollistët më të shtrenjtë nga të dyja skuadrat
Ballkani është një skuadër me buxhet shumë herë më të vogël se Cluj dhe natyrisht edhe futbollistët e kampionit kosovar kanë vlerë më të vogël në tregun e transferimeve.
Sulmuesi anësorë, Ermal Krasniqi është futbollisti me vlerën më të madhe te Ballkani me 350 mijë euro.
Ndërkohë pas tij vijnë dy kapitenët Edvin Kuc dhe Armend Thaqi që kanë një vlerë prej 300 mijë eurove.
Në pozitat katër dhe pesë si futbollistët më të vlefshëm tek kampioni kosovar janë Rrustem Hoxha dhe Nazmi Gripshi që kartoni i tyre vlerësohet 275 mijë euro.
Në anën tjetër te kampioni në fuqi i Rumanisë futbollistët më të vlefshëm janë nga reparti i mbrojtjes.
Qendërmbrojtësi Andrei Burca është futbollisti që ka vlerën më të madhe te Cluj me katër milionë euro.
Në pozitën e dytë është mbrojtësi i djathtë Cristian Manea edhe ky me nënshtetësi rumune.
Sulmuesi kroat, Gabriel Debeljuh është i treti më i vlefshëm tek Cluj me 2,2 milionë euro.
Ndërkohë listën prej top pesë futbollistëve më të vlefshëm e mbyllin spanjolli Jefte Betancor dhe rumuni Alexandru Paun që kanjë vlerën e njëjtë prej 1,6 milionë eurove.
Trofetë dhe arritjet më të mëdha të dy klubeve
Ballkani nuk është njohur si skuadër që fiton trofe në futbollin kosovar. Në fakt trofeu i parë në Suharekë shkoi këtë vit, ku ekipi i udhëhequr nga trajneri Ilir Daja fitoi titullin e kampionit.
Pra në histori të klubit, Ballkani ka vetëm një titull të kampionit, por ka një sukses që nuk e ka arritur asnjë klub nga Kosova.
Suksesi më i madh i suharekasve është padyshim arritja në grupe të një gare evropiane, gjë që nuk e ka bërë më parë asnjë skuadër e vendit tonë.
Dallim të madh ka në aspektin e trofeve kampioni në fuqi i Rumanisë, CFR Cluj.
Cluj ka fituar 16 trofe shtetërorë, ku ka fituar tetë herë titullin e kampionit në Rumani, me edicionin 2007/08 që ishte hera e parë.
Gjiganti rumun ka fituar edhe katër herë Kupën e Rumanisë si dhe katër herë të tjera Superkupën. /Telegrafi/