Azerbajxhani dhe Armenia ranë sot dakord për një armëpushim duke nisur nga mesdita në rajonin separatist të Nagorni Karabakh, të përfshirë në luftime, njoftoi diplomacia ruse pas negociatave maratonë në Moskë mes shefave të diplomacisë armene dhe azere.
“Një armëpushim u njoftua duke nisur nga ora 12:00 më 10 tetor 2020 për qëllime humanitare”, theksoi ministri rus i Punëve të Jashtme, Serguei Lavrov, raporton ATSH.
Ministri, Serguei Lavrov konfirmoi se armëpushimi do të mundësojë shkëmbimin e të burgosurve të luftës, të personave të tjerë dhe të trupave të vrarë në marrëveshje me kriteteret e Komitetit të Kryqit të Kuq.
“Azerbajxhani dhe Armenia janë angazhuar gjithashtu në negociata thelbësore për të arritur sa më shpejt një zgjidhe paqesore të konfliktit me ndërmjetësimin e bashkëpresidentëve të grupit të Minskut të OSBE-së”, theksoi Lavrov.