Carlo Ancelotti ka bërë të ditur se para dy vitesh, Roma i kishte bërë ofertë që ta merrte drejtimin e Giallorossëve, mirëpo ai kishte nënshkruar me Bayern Munichun.
Strategu italian u shkarkua nga bavarezët në javën e kaluar ashtu që është lidhur me shumë skuadra, duke përfshirë Milanin dhe përfaqësuesen e Italisë.
“(Presidenti i Romës, James) Pallotta më telefonoi para dy vitesh që të më merrte te Roma, mirëpo unë veçmë kisha nënshkruar për Bayernin”, ka treguar Ancelotti për Il Messaggero.
Kjo ka qenë periudha kur Roma e kishte shkarkuar Rudi Garcia (2015) dhe pastaj e angazhuan Luciano Spallettin si trajner.
Ancelotti e ka kaluar pjesën më të madhe të karrierës së tij si futbollist te Roma (1979-1987), prandaj gjithmonë ka dashur ta trajnojë klubin nga kryeqyteti italian.
Sidoqoftë, trajneri ka vendosur të qëndrojë më i tërhequr nga syri publik. Ai ka refuzuar ta ndjekë nga afër ndeshjen ndërmjet Italisë dhe Maqedonisë, si edhe nuk do të shkojë në derbin e Milanos.
“Nuk dua që të nxis spekulime të panevojshme apo t’i shkaktoj probleme dikujt tjetër”, ka thënë trajneri. /Telegrafi/
