Komuna e Suharekës në bashkëpunim me Kompaninë Rajonale të Mbeturinave “Ekoregjioni” të enjten kanë realizuar aksionin për pastrimin e mbeturinave në aksin rrugor që lidhë Suharekën me Shtimen, më saktësisht në Grykën e Caralevës.
Me këtë rast, kryetari i Komunës, Bali Muharremaj ka kërkuar kujdes të shtuar nga të gjithë qytetarët për një mjedis të pastër.
“Apeloj te të gjithë qytetarët e komunës tonë, te të gjithë që kalojnë këndej pari, që ta mbajnë ambientin e pastër”, ka thënë Muharremaj, raporton Telegrafi.
Sipas tij, obligim të ngjashëm kanë edhe operatorët ekonomikë që veprojnë përreth kësaj rruge.
“Njëherësh u bëj thirrje kompanive dhe firmave që i kanë objektet afër rrugës për mirëmbajtje të hapësirave përkatëse, pasi që për këtë ekziston edhe një vendim i miratuar nga Kuvendi i Komunës”, ka deklaruar Muharremaj.
Ai ka theksuar se të gjithë duhet të kontribuojnë për ta pasur një mjedis sa më të pastër.
“Besoj që së bashku me ‘Ekoregjionin’, shumë shpejtë do ta organizojmë aksionin vullnetar dhe do ta bëjmë komplet pastrimin e territorit të Komunës së Suharekës”, ka përfunduar Muharremaj. /Telegrafi/