Kylian Mbappe do të largohet nga Paris Saint-Germain në fund të këtij sezoni, një lajmë që sot është bërë publik nga shumë mediume.
Sipas raportimeve nga Franca, në fund të seancës stërvitore të së martës, ylli i futbollit njoftoi presidentin e tij, Nasser Al-Khelaifi, se nuk do ta rinovojë kontratën, e cila i skadon në qershor.
Pasi ky lajm u bë publik kudo, ish-futbollisti i PSG-së, Jerome Rothen zhvilloi një bisedë me presidentin e PSG-së, Nasser Al-Khelaifin mbi këtë çështje, të cilën e zbuloi edhe për media.
“Presidenti i PSG-së më tha se ndjehet i zhgënjyer, por ai është një biznesmen, tashmë ishte mësuar me idenë se mund të humbiste një pjesë të investimit të bërë gjashtë vjet më parë te Mbappe”.
“Ai vlerësoi që Mbappe ia tha vendimin që kishte marrë ballë për ballë. Ndaj sulmuesit nuk do të ketë sanksione, ndërsa Al-Khelaifi në përgjithësi është i kënaqur me mënyrën se si shkoi ky investim”, ka treguar Rothen. /Telegrafi/