Me rastin e 27 vjetorit të Epopesë së Ushtrisë Çlirimtare të Kosovës (UÇK), kryetari i Komunës së Skenderajt, Fadil Nura, së bashku me kryesuesen e Kuvendit Komunal, Adelina Spahiu, kryetarin e PDK-së, Memli Krasniqi, asamblistë, drejtorë, deputetë, familjarë të dëshmorëve, invalidë dhe veteranë të UÇK-së, si dhe qytetarë të shumtë, kanë bërë homazhe në Kompleksin Memorial “Adem Jashari”.
Ata vendosën buqeta me lule për të vazhduar me homazhe përkujtimore edhe në Memorialin e Dëshmorëve në Marinë, shkruan Telegrafi.
“Me këtë rast u vlerësua lartë lufta dhe sakrifica e komandantit legjendar, Adem Jashari, e familjes Jashari dhe e gjithë dëshmorëve të rënë për lirinë e Kosovës”, thuhet në njoftim.
Për nder të Epopesë së UÇK-së, është mbajtur edhe seanca solemne nga Kuvendi Komunal i Skenderajt, ndërkaq në palestrën sportive “Ilaz Kodra” është zhvilluar turneu tradicional në volejboll në konkurrencën e femrave.
“Aktivitetet do të vazhdojnë edhe ditëve në vijim, përkatësisht më 6 dhe 7 mars. Lavdi e përjetshme Komandantit Legjendar Adem Jashari, familjes Jashari dhe gjithë dëshmorëve të kombit”, thuhet tutje në njoftim. /Telegrafi/
