Në 26-vjetorin e rënies heroike të dëshmorëve të Irzniqit në Deçan, banorët e këtij fshati me respekt dhe mirënjohje kanë kujtuar sakrificën e tyre për lirinë e Kosovës.
Luftëtarët e Ushtrisë Çlirimtare të Kosovës nga Irzniqi dhanë jetën e tyre në një përballje të pabarabartë me forcat serbe, duke mbetur përjetësisht në kujtesën e banorëve të këtij vendi si simbol i trimërisë dhe qëndresës.
Por kujtimet janë ato që në vete bartin krenari dhe dhimbje, njësoj si për dëshmitarët e kësaj beteje të cilët me emocione rrëfejnë tmerrin e datës 11 gusht të 1998.
Për zv. komandantin e UÇK- së gjatë asaj kohe Bajram Daci, për Telegrafin shprehet se dhimbja dhe krenaria shkonin bashkë dhe misioni i tyre ishte shpëtimi i shumë luftëtarëve e ndër ta edhe i komandantit Maxhun Çekaj, i cili nuk pati fatin të mbijetojë.
“Ka qenë një ditë shumë e vështirë për çështjen kombëtare, i tërë fshati kemi qenë duke luftuar dhëmbë për dhëmbë me okupatorin serbo-jugosllav, ku armikut i kemi shkaktuar dëme të mëdha, në atë betejë ka mbetur i vrarë komandanti Maxhun Çekaj, Gëzim Dervishaj dhe është plagosur rëndë Ismet Haskaj Xhevat Zeni”, ka thënë Daci.
Edhe për dëshmitarin tjetër Hajdar Çekaj, dhimbja edhe sot e kësaj dite e shoqëron duke kujtuar momentet e vështira të asaj periudhe.
“Fshati bombardohej vazhdimisht, çdo gjë digjej, ne bënim përpjekje që disa luftëtarë ti tërheqim nga vija e frontit të cilit kishin mbetur në vijën e parë të frontit të izoluar u organizuam dhe deri natën vonë ne u detyruam që në errësirë ti hapim varret dhe ti varrosim të vrarët”, ka rrëfyer Çekaj.
Në ceremoninë përkujtimore, familjarët e dëshmorëve, banorët e zonës, dhe përfaqësues të institucioneve vendore vendosën kurora me lule në varrezat e dëshmorëve.