“Zona më e nxehtë” e Australisë raporton rritjen më të vogël ditore të rasteve me coronavirus që nga qershori

“Zona më e nxehtë e rasteve me coronavirus në Australi e Victoria njoftoi të hënën rritjen më të vogël ditore të infeksioneve në tre muaj, megjithëse kryeministri i shtetit Daniel Andrews tha se nuk kishte ende plane për të lehtësuar kufizimet më shpejt sesa pritej.

Sipas Reuters, përcjell Telegrafi, Victoria, shteti i dytë më i populluar në Australi dhe shtëpia e një e katërta e 25 milionë njerëzve të saj, raportoi 11 raste të reja me coronavirus në 24 orët e fundit, numri më i vogël njëditor që nga 16 qershori.

Vendi gjithashtu raportoi dy vdekje për shkak të virusit.

“Kjo nuk është vetëm një ditë e mirë. Kjo është një ditë e shkëlqyer”, u tha Andrews gazetarëve në kryeqytetin e Viktorias, Melburn.

Por Kryeministri tha se qeveria e tij nuk do të përshpejtojë një afat kohor për lehtësimin e kufizimeve, të cilat u vendosën pasi numri i rasteve ditore arriti në 700 në fillim të gushtit.

“Pozicioni zyrtar është i qartë”, tha Andrews.

Ndryshe, Melburni ka qenë nën një nga bllokimet më të vështira, duke përfshirë “shtetrrethimin” natën, por qeveria e shtetit ka thënë se do të lejojë vendet e ndërtimit, impiantet e prodhimit, magazinat dhe objektet e kujdesit për fëmijët në kryeqytet të hapen më 28 shtator, nëse numri mesatar i rasteve gjatë dy javëve është nën 50, ndërkohë që mesatarja në Melburn tani është nën 35.

Australia ka regjistruar recesionin e saj të parë në 30 vjet, ndërsa papunësia efektive është ende në 13%, pasi kufizimet e lidhura me virusin paralizuan aktivitetin e biznesit.

Australia ka raportuar gati 27,000 raste, 75% e të cilave kanë qenë në Victoria, dhe 851 vdekje për shkak të virusit. Gati 90% e të gjitha vdekjeve nga COVID-19 janë regjistruar në Victoria. /Telegrafi/