Sipas Institutit Kombëtar të Shëndetësisë Publike, vetëm të shtunën tetë persona kanë vdekur nga coronavirusi.

IKSHPK thotë se pacientët që kanë ndërruar jetë, përveç infeksionit COVID-19, kishin edhe sëmundje të tjera shoqëruese.

Bazuar në të dhënat e fundit, numri i të vdekurve në Kosovë nga sëmundja COVID-19, që e shkakton coronavirusi i ri, arrin në 66.

Ndërkaq, numri total i rasteve pozitive 3.356 raste nga 24.921 persona të dyshimtë në virusin SARS-CoV-2.

Po ashtu janë shëruar 50 pacientë derisa numri i përgjithshëm i të shëruarve deri më sot është gjithsej 1.874 raste, kurse raste aktive 1.416, njofton Telegrafi.

IKSHPK ka kërkuar nga qytetarët që të respektojnë masat mbrojtëse ndaj virusit COVID-19.

“Vazhdoni të mbani distancën fizike dhe maskat. Lani duart me kujdes disa herë në ditë nga 20-30 sekonda. Lehtësimi i masave është bërë për të na bërë më të përgjegjshëm! Ju lutem të keni kujdes, sepse akoma ekziston rrezik i përhapjes në vendet ku ka grumbullim të madh të njerëzve”, njofton Telegrafi.