Policia e Kosovës edhe sot, më 14 prill 2021, ka vazhduar me angazhime në drejtim të parandalimit të përhapjes së pandemisë, gjegjësisht në realizimin e planit operativ dhe vendimeve të institucioneve rreth realizimit të masave për parandalim të Covid 19.

Siç njofton Policia, patrullat policore janë të angazhuara në tërë territorin e vendit 24/7.

“Patrullat policore janë duke ndërmarrë veprime, sanksione bazuar në Ligjin AntiCovid 19 edhe pse ndëshkimet nuk janë mjeti kryesor, ato do të përdorën në rastet që parasheh ligji. Por, me këtë rast edhe një herë, ashtu si institucionet shëndetësore dhe jo vetëm, apelojmë, kërkojmë që të respektohen masat: maska, distanca, higjiena, kufizimi i kohës së lëvizjes, pra të gjitha ato masa që janë ndërmarrë nga institucionet e vendit, në interes të shëndetit publik”, thuhet në njoftimin e bërë nga Policia.

Ndryshe, masat e reja kufizuese kanë hyrë në fuqi më 7 prill dhe do të zgjasin deri më 18 prill. Me masat e reja është e kufizuar lëvizja e qytetarëve si dhe sektori i gastronomisë dhe qendrat tregtare nuk lejohen të punojnë. /Telegrafi/