Rusia ka lëshuar një breshëri raketash në objektiva anembanë Ukrainës për të tetën herë në tetë javë.

Reklama

Sipas mediave të huaja, përcjell Telegrafi, atje është raportuar për ndërprerje të konsiderueshme të rrjetit elektrik, kryesisht në lindje.

Gjithashtu në jug, Odesa ishte pa energji elektrike ndërkohë që Ukraina thotë se katër persona u vranë.

Por sulmet, të cilat erdhën gati dy javë pas të fundit, mund të kenë bërë më pak dëme sesa në rastet e mëparshme.

Ukraina thotë se ka rrëzuar 60 nga 70 raketat e lëshuara nga Rusia ndërkohë që Moska thotë se goditi të 17 objektivat e saj.

Reklama

Në fjalimin e tij me video të hënën vonë, presidenti ukrainas Volodymyr Zelensky tha se sulmet kishin goditur gjithashtu furnizimet me energji elektrike në Moldavinë fqinje.

Reklama

“Kjo dëshmon edhe një herë se aftësia e Rusisë për të kryer sulme të tilla masive terroriste është një kërcënim jo vetëm për Ukrainën, por edhe për të gjithë rajonin tonë”.

Sulmet e mëparshme ruse kanë goditur rrjetin energjetik të Ukrainës, duke lënë miliona pa energji elektrike dhe ngrohje me ardhjen e dimrit.

Paralajmërimet se Rusia po planifikonte një valë të re sulmesh kanë qarkulluar prej disa ditësh.

Dhe ato arritën përfundimisht vetëm disa orë pas një serie shpërthimesh në dy baza ajrore thellë brenda Rusisë, për të cilat Moska fajësoi dronët ukrainas “të kapur” nga mbrojtja ajrore ruse.

Reklama

Tre ushtarakë u vranë dhe dy aeroplanë u dëmtuan lehtë nga shpërthimet, tha ministria ruse e mbrojtjes ndërsa Ukraina ende nuk ka komentuar rreth një zhvillimi të tillë. /Telegrafi/

Reklama