Deputeti i AAK-së, Dr. Shemsedin Dreshaj ka thënë se raporti i sotëm i IKSHPK-së, ku paraqiten rastet me COVID-19, është i modeluar. 

Sipas tij është zvogëluar numri i testimeve, që rrjedhimisht ulet edhe numri i rasteve të reja.

Ai tutje u shpreh që sipas përqindjeve, nuk ka ndonjë dallim të madh krahasuar me ditën e djeshme.

“Këtu praktikisht ka shumëçka të modeluar. Në rend të parë është zvogëluar numri i testeve dhe kur zvogëlohet numri i testeve. Pritshëm është që të kemi edhe raste më pak të reja. Pritshëm është që të kemi më shumë të shëruar se raste të reja, të cilat janë evidentuar në ditën e sotme. Unë mendoj që fundjava ka prezentu një incidencë shumë më të rritur sesa dita e sotme”, tha Dreshaj për Kanal 10.

“Kjo do të thotë që nesër mund të kemi krejt shifra kontradiktore krahasuar me ditën e sotme se shtohet numri i testeve. Nëse hyni në përqindje nuk ka ndonjë dallim të madh në raport me ditën e djeshme dhe të sotme. Këto gjëra me siguri kanë një prapavijë e cila nënkupton 11 ditë që e kanë blloku vendin dhe ndoshta tentojnë që pas 11 ditëve të kemi një liberalizim të lehtë ose ndoshta udhëtimi i pushtetarëve tanë në Shqipëri të mos i përshkruhet asaj që do të arrihet tek incidenca brenda”, tha ai.

Ndryshe, sot në vendin tonë u raportua se nga 3,208 testime, 345 raste dolën pozitivë me COVID-19, 518 pacientë u shëruan dhe 8 persona humbën jetën.