Greqia është e gatshme të sigurojë anije për të ndihmuar eksportin e grurit nga Ukraina, tha sot Sekretari i Përgjithshëm i NATO-s, Jens Stoltenberg.

Duke folur me gazetarët në samitin e NATO-s në Madrid, Stoltenberg tha se “Greqia njoftoi se është gati të vërë në dispozicion anije për të nxjerrë grurin nga Ukraina”.

Ndërkohë, kryeministri grek Kyriakos Mitsotakis tha se vendi i tij “kishte një rol të veçantë rreth kësaj përpjekje pasi kontrollon flotën më të madhe tregtare në botë”, raporton skynews.

“Greqia, edhe një herë, po ofron të ndihmojë dhe të mbështesë çdo përpjekje të bërë, nën kujdesin e Kombeve të Bashkuara, në mënyrë që drithi i bllokuar aktualisht në Ukrainë, kryesisht në Odesa, të largohet nga Ukraina dhe përfundimisht të përfundojë në vendet që kanë nevojë sot”, tha ai.

Ukraina dhe Perëndimi kanë akuzuar Rusinë për bllokimin e porteve të Ukrainës për të parandaluar eksportet e grurit, duke kontribuar në krizën globale të ushqimit.

Rusia i ka mohuar akuzat dhe ka thënë se Ukraina duhet të heqë minat nga Deti i Zi për të lejuar lundrim të sigurt. /Telegrafi/