Shkarravina!

Arsim N. Sejdiu

Po mendoja, po lodhja trurin, po meditoja, po analizoja, por nuk po gjeja dot një zgjidhje të pranueshme për ta konstituuar Kuvendin e Republikës sime të vogël, që në një hartë të zakonshme të botës nuk gjendet dot kollaj.

I thash vetes, meqë unë nuk po mund ta gjejë një zgjidhje, me çfarë të drejte po akuzoj njerëzit e zgjedhur të popullit , që kanë tru, që kanë përgjegjësi akoma më të madhe se unë, të gjejnë zgjidhjen. Andaj të presim derisa truri i tyre të gjejë dhe do ta gjejë zgjidhjen më të mirë për “popullin”, sepse ata janë kurdisur aty, për t`i shërbyer “popullit” apo e kam gabim… Andaj durim!

Seminari për Albanologjinë u organizua edhe sivjet me gjithë mangësitë në financa e në kapacitete. Dhe, falë përvojës me disa dhjetëvjetësha, seminari apo drejtuesit a tij kanë arritur “majat”. A ka më kënaqësi se të dëgjosh drejtuesit e tij teksa flasin për gjuhën shqipe, ligjërojnë me kompetencë dhe të njëjtit “krokasin me fodullëk” dhe flasin atë (shqipen) me një nëndialekt apo të folme të mëhallës

Sa për veshjen e tyre të mos flasin, kanë vendosur të vishen “kullë” që seminaristët “e ndrojtur” të ndjehen më rehat. O burrani ma gjeni një vend të dytë në planet ku ka qasje të tilla “pedagogjike”, “të përparuara”, si tek doktorët tanë të albanologjisë tek udhëheqësit e seminarit të veshur “kullë”. Unë nuk e di a është seminar albanologjie apo cfilatë mode.

E dëgjon edhe ambasadoren tonë në Këshill të Sigurimit, duke mbrojtur çështjen shqiptare dhe të Kosovës, nga sulmet e përfaqësuesit të Serbisë. Unë nuk pata kapacitet “intelektual” ta kuptoja. Uroj ta ketë kuptuar dikush nga ata që e kanë profesion këtë punë dhe në ditët në vazhdim të na sqarojnë, përndryshe se si po më vjen marre, nga ato “fakte të zbehta” që dëgjova nga ajo.

Dhe, nuk është e tëra, një re jona, norvegjezja, Rita Augestad Knudsen, publiciste, madje sipas të gjitha gjasave nuk i takon fare besimit Islam, ka botuar një broshurë me një studim analitik rreth arsyeve të mundshme që kanë shtyrë shqiptarët t`i bashkohen rrymave ekstremiste dhe luftës në Siri. Ajo në studimin e saj sheh diçka krejt tjetër nga ajo që jemi mësuar të dëgjojmë e lexojmë nëpër mediat tona dhe në analizat zyrtare. Mediat megjithatë e përmendën këtë studim, por kjo përfundoi me kaq. As Bashkësi Islame, as analistë e publicistë vendorë, as media, as opinionistë, heshtje e plotë dhe nuk e di pse!? Nuk u pëlqeu qasja apo ndoshta se prishen “llogaritë” se është gruaja e një politikani, apo mos ndoshta mund ta hidhërojnë dikë jashtë apo brenda. Megjithatë studimi është, ndoshta, më objektivi që kemi mundur ta lexojmë a dëgjojmë prej se ballafaqohemi me këtë “problem”.