Rrëfimi për bazën ajrore që u bë simbol i humbjes ruse në Ukrainë

Që nga fillimi i luftës, një aeroport ushtarak dhe një fshat jashtë qytetit Kherson fituan statusin e “legjendës” në Ukrainë.

E pushtuar nga forcat ruse brenda disa ditësh pas fillimit të agresionit në Ukrainë, Chornobaivka u sulmua në mënyrë të përsëritur nga forcat ukrainase, përcjell Telegrafi.

Kështu, baza u bë një nga fushat më të rëndësishme të luftës.

Atje, pajisjet ruse u dërguan me aeroplan me qëllim të përforcimit të trupave në jug. Ambicia fillestare ishte të avancohej përgjatë bregut jugor të Ukrainës, fillimisht në Mykolaiv dhe më pas në Odesa.

Më e rëndësishmja, baza ajrore në Chornobaivka u mundësoi trupave ruse të largoheshin nga vendkalimet e rrezikshme të lumenjve ndërsa “shtyheshin” drejt perëndimit.

Pushtimi i bazës do të ishte i vështirë.

Helikopterët dhe automjetet ruse u shkatërruan dhe dy gjeneralë rusë u vranë atje, ndërsa forcat ukrainase merrnin caqet ndonjëherë në baza ditore.

Dhe kjo rezistencë lindi një simbol të lavdisë së Ukrainës dhe humbjes ruse.

Shumë ukrainas e panë Chornobaivka si “përfaqësuese” të të gjithë vendit të tyre, pasi strategjia e pushtimit të Rusisë filloi të dështonte, përcjell Telegrafi.

Madje ajo u lavdërua dhe për të u bënë këngë dhe piktura – dhe ukrainasit iu kthyen humorit të zi.

Emri Chornobaivka u bë një meme lufte për ukrainasit, sinonim i viktimave masive ruse.

Në fillim të këtij muaji, ukrainasit rimorën qytetin Kherson dhe Chornobaivka pothuajse në të njëjtën kohë.

Pas tyre, forcat ruse lanë një fushë të madhe të minuar dhe një “varrezë” me armë, automjete dhe personel rus – edhe pse forcat ruse nuk kanë konfirmuar kurrë detaje të humbjeve të tyre në jug.

Për disa javë përpara se rusët të tërhiqeshin, ushtria e Ukrainës synonte sistematikisht ura, pika komandimi dhe depo armësh.

Megjithatë, ministria e mbrojtjes në Moskë tha se ata nuk kishin pësuar humbje as të ushtarëve apo pajisjeve gjatë tërheqjes së tyre nga bregu perëndimor i lumit Dnipro.

Por përtej mbeturinave të pushtimit ushtarak, ka dalë një histori tjetër e një komuniteti të vogël Chornobaivka ngjitur me bazën ajrore, i shkëputur nga bota e jashtme për muaj të tërë dhe duke u bërë një simbol i rezistencës kombëtare pa e ditur këtë.

“Ne dilnim vetëm disa herë në muaj për të blerë ushqime. Nuk shkuam askund”, ka treguar Viktoria e cila deri në luftë kishte punuar si operatore në aeroport.

“Kemi rritur karrota, panxhar dhe patate në oborrin tonë”.

Ditë pas pushtimit rus, më 8 mars, ajo kujtoi se kishte shkuar me një mikeshë për të blerë bukë: “Rusët arritën në dyqan me një tank dhe qëlluan në ajër. Unë kurrë nuk kisha parë një tank në jetën reale më parë”.

Pak muaj më vonë, vendi i saj i vjetër i punës tanimë “qëndron” në gërmadha.

E ulur në një stol në qendër të fshatit, Svitlana Miroshnichenko, tregoi për tronditjen e saj kur pa trupat ruse që abuzonin me flamurin e vendit të saj.

“Kur u hoq flamuri ukrainas, ata e shkelën atë. Rusët u tallën me flamurin ukrainas, me të fshinë xhamat e makinës. U preka shumë. Më pas ata ngritën flamurin rus. Ne nuk e pranuam”.

Ndërsa u tërhoqën nga Khersoni më 11 nëntor, forcat ruse shkatërruan të gjitha komunikimet.

Chornobaivka ishte jashtë rrjetit dhe banorët nuk ishin në gjendje të telefononin të afërmit e tyre.

Një ish-mësuese për 30 vjet në shkollën lokale, Svitlana flet për dy ish-nxënës të vrarë në fushën e betejës dhe të tjerë që ende mbrojnë vendin e tyre.

Sfida tjetër do të jetë rindërtimi i shtëpive të dëmtuara dhe rivendosja e furnizimit me energji elektrike, por pas kësaj Chornobaivka do të duhet të trajtojë tensionet brenda komunitetit që u krijuan gjatë tetë muajve të okupimit.

“Disa njerëz qëndruan nën pushtimin rus. Të tjerë ikën”, shpjegon kreu i fshatit Ihor Dudar.

“Disa prej tyre kishin nevojë të evakuonin fëmijët e tyre. Të tjerë thjesht ndjenë një frikë shumë të fortë. Dhe tani banorët e Chornobaivka që shpëtuan mendojnë se po gjykohen se ikën dhe u frikësuan shumë”.

Siç vë në pah shkrimi i BBC, përcjell Telegrafi, qëndrimi në fshat nën pushtimin rus përbënte një kërcënim vdekjeprurës.

Autoritetet lokale vlerësojnë se forcat ruse qëlluan dhe vranë të paktën 20 civilë në Chornobaivka. Katër banorë vendas mbahen ende robër nga rusët.

“Ushtria ruse po kalonte me makinë pranë dyqanit. Ata vranë me armë zjarri dy adoleshentë pasi u kërkuan cigare. Këta dy adoleshentë 19-vjeçarë ishin fqinjët e mi”, ka rrëfyer Viktoria për BBC.

Ihor Dudar tregoi fotot e bëra menjëherë më pas të dy adoleshentëve të shtrirë të vdekur në një pellg gjaku. Forcat ukrainase po hetojnë vdekjen e tyre.

Ukrainasit tani po flasin për ngritjen e një muzeu lufte në aeroport. Megjithatë, lufta nuk ka përfunduar.

Predha artilerie vazhdojnë të bien shumë pranë shtëpive të njerëzve këtu. Por pavarësisht rrezikut, shumë banorë besojnë se për ta më e keqja ka kaluar. /Telegrafi/