Qeveria e Kosovës në mbledhjen e mbajtur sot ka miratuar vendime për masat që do të ndërmerren në funksion të luftimit dhe parandalimit të pandemisë COVID-19.

Sipas vendimit, të gjithë qendrat tregtare në Kosovë do të punojnë deri në ora 21:00.

“Janë obliguar të gjitha qendrat tregtare në territorin e Republikës së Kosovës që veprimtarinë tregtare ta ushtrojnë prej orës 05:00 të mëngjesit deri në orën 21:00, duke zbatuar në përpikëri kushtet sipas Manualit për mbrojtje nga COVID-19, e mbi të gjitha mbajtjen e detyruar të maskave dhe krijimin e kushteve për distancë fizike të konsumatorëve”, thuhet në njoftimin e Qeveris së Kosovës, përcjell Telegrafi.

Po ashtu, është pezulluar puna e tregjeve publike të automjeteve dhe të kafshëve.

“Vendimi i miratuar nga Qeveria e Kosovës pezullon punën e tregjeve publike të automjeteve dhe tregjet e kafshëve, në të gjithë territorin e Republikës së Kosovës”, vijon njoftimi. /Telegrafi/