Pse kaq shumë mjekë në Serbi po vdesin nga COVID-19?

Numri i përgjithshëm i të vdekurve nga coronavirusi në Serbi është rreth 3,600, por shkalla e vdekjeve në mesin e mjekëve dhe infermierëve është shumë më e lartë se në kombet e tjera.

Sipas Euronews, përcjell Telegrafi, të dhënat nga Unioni i Mjekëve dhe Farmacistëve (UDP) kanë zbuluar se deri në 72 mjekë kanë vdekur nga coronavirusi në Serbi, një vend me shtatë milionë njerëz, krahasuar për shembull me 43 në Mbretërinë e Bashkuar, e cila ka një popullsi prej më shumë se 60 milionë njerëzve.

Ndryshe, Serbia ka parë vetëm 3,600 vdekje në total krahasuar me MB-në më shumë se 80,000.

Lidhur me këtë, shkruan më tej Euronews, kritikët fajësojnë gjendjen e sistemit të kujdesit shëndetësor të vendit, i cili është ”nënfinancuar”.

Dhe kur coronavirusi goditi, sektori i shëndetësisë nuk ishte gati.

“Organizimi i keq, lodhja e personelit, mungesa e pajisjeve: e gjithë kjo kontribuoi në një numër të lartë vdekjesh midis mjekëve”, ka thënë për Euronews, Rade Panic, presidenti i UDP, duke shtuar se numri i të vdekurve mund të jetë më i lartë se 72.

Një çështje tjetër, tha Panic, është se pozitat e larta në spitalet serbe priren të jenë emërime politike, që do të thotë se besnikëria e menaxherëve të spitaleve ndaj elitës në pushtet të vendit është më e rëndësishme sesa aftësitë e tyre menaxheriale.

Nga fillimi, ka thënë ai, spitalet serbe nuk kanë arritur të mbajnë seksione të ndara midis pacientëve me COVID-19 dhe sëmundjeve të tjera, ndërsa sektori mjekësor ka vuajtur nga një mungesë e madhe e pajisjeve mbrojtëse personale (PPE).

Kur profesionistët e kujdesit shëndetësor, përmes medias, janë përpjekur të ngrenë shqetësimet e tyre, ai tha, gazetarët që shkruajnë historitë janë sanksionuar, përfshirë një reporter i cili u arrestua në prill pasi theksoi kushtet e tmerrshme në një spital. /Telegrafi/