Propaganduesi bjellorus mburret duke thënë se vendi i tij tani është një “shtet bërthamor”, teksa kërcënon Poloninë dhe Lituaninë

Ryhor Azaronak, një propagandues bjellorus, u mburr në televizionin kombëtar se vendi i tij tani është një “shtet bërthamor”, teksa kërcënoi të sulmonte Poloninë fqinje dhe Lituaninë.

Në një video të ndarë në Twitter, Azaronak mund të dëgjohet duke u lavdëruar për fuqinë që Bjellorusia do të ketë si një shtet i armatosur me armë bërthamore, shkruan Newsweek, përcjell Telegrafi.

Presidenti rus Vladimir Putin javën e kaluar njoftoi se vendi i tij do të staciononte armët bërthamore taktike në Bjellorusi, duke thënë se masa nuk do të shkelte marrëveshjet e mos-përhapjes bërthamore.

Stacionimi i armëve bërthamore ruse në Bjellorusi, megjithatë, mund të nënkuptojë që vendi, i udhëhequr nga aleati i Putinit, Alexander Lukashenko, do të përfshihet më shumë në luftën e Rusisë në Ukrainë.

Belarusian propagandist boasts on state TV that Belarus is now a nuclear state and threatens to annihilate Poland and Lithuania. pic.twitter.com/t6DUZi3XRg

— Dmitri (@wartranslated) March 27, 2023

Bjellorusia ndan kufijtë me Ukrainën, Poloninë, Lituaninë dhe Letoninë.

“Bjellorusia është një shtet bërthamor! Një shtet që është i aftë, në rast të një sulmi në territorin e tij, të përgjigjet me armë bërthamore taktike”, citohet të ketë thënë Azaronak, i cili konsiderohet të jetë një nga propagandistët më të zëshëm të Lukashenkos.

“Varshava do të shkrihet dhe Vilnius do të mbytet… Kjo do të ndodhë”, vazhdoi ai, duke shtuar se Bjellorusia ishte detyruar nga Polonia dhe Lituania të vepronin në këtë mënyrë. “Ju na detyruat, kështu që mos u ankoni tani, ju jeni paralajmëruar!”.

Sipas Newsweek, kjo nuk është hera e parë që Azaronak ka sulmuar Poloninë dhe Lituaninë në televizionin kombëtar bjellorus, megjithëse është hera e parë që ai e ka bërë këtë duke përdorur kërcënimin e një sulmi bërthamor.

Nëse Putin ndjek premtimin e tij, kjo do të jetë hera e parë që nga rënia e Bashkimit Sovjetik që Moska do të ketë vendosur armë bërthamore jashtë vendit.

Ende nuk dihet saktësisht se kur armët do të transferohen në Bjellorusi. /Telegrafi/