Pesë arsye përse Greqia qëndron në Eurozonë

1. Graccidenti nuk është punë e thjeshtë

Në muajt e fundit thuhet vazhdimisht se nëse grekët nuk i bëjnë dot një pagesë FMN-së, janë zyrtarisht bankrot – një automatizëm i pashmangshëm hyn në fuqi. Kështu nuk ndodh. Shefja e FMN-së, Lagarde, nuk ka për të dalë menjëherë që të shpallë bankrotin. Një gjë e tillë duhet konstatuar formalisht. Kjo zgjat së paku disa ditë. Edhe atëherë Lagarde ka akoma hapësirë politike, sikur grekët të zotohen për përmirësim. Greqia largohet kundër dëshirës të të gjithëve "gabimisht" nga Unioni Monetar? Kaq të papushtetshme nuk janë "Institucionet".

2. Dalja nuk kushton patjetër më pak

Grekët largohen nga Unioni Monetar – po pastaj? Ekzistojnë edhe rreziqet e shumëpërfolura të infektimit. Spekulantët mund të përpiqeshin të shtynin Portugalinë ose Italinë në falimentim. BE është më i përgatitur se disa vite më parë, por këtë askush në Bruksel nuk e përjashton krejtësisht.

Por, në çdo rast Bashkimi Evropian do ta mbështeste Greqinë edhe më tej në rast largimi, sepse Grexit mund të shkaktonte shkatërrimin e plotë ekonomik të vendit. Pavarësisht nëse Greqia do të ishte pastaj pjesë e BE apo jo, Bashkimi Evropian duhet të ndihmonte. Kjo nuk do të ishte shumë më e leverdishme, se sa mbajtja e grekëve në Bashkimin Monetar.

3. Absurditet gjeopolitik

Pjesë e një Ballkani të paqëndrueshëm, mik tradicional i Rusisë, portë e hapur për refugjatët në Mesdhe, e gjitha kjo është Greqia momentalisht. A duan shtetet anëtare të BE-së ta çojnë një vend të tillë me të vërtetë në izolim me pasoja të paparashikueshme gjeopolitike? Përgjigja qëndron në semantikën e ditëve të fundit. Shumë politikanë evropianë e argumentojnë ndihmën për Greqinë jo më me arsye ekonomike, por gjeopolitike.

4. Cipras e ka kuptuar më në fund

Ka zëra në Bruksel që duhen marrë seriozisht, që thonë se takimi i ministrave të pakënaqur të Financave në Riga ka qenë pika e kthesës. Kryeministri grek i lojës së pokerit Cipras e ka kuptuar se nuk ka kartë për të hedhur dhe ka këmbyer negociatorët e rëndësishëm. Me sa duket, Trojka do të ketë të bëjë përsëri me njerëz, që kuptojnë diçka nga çështja, dhe nuk bëjnë vetëm ëndërrime ideologjike.

5. Unioni është një union

Sikur Greqia të dilte jashtë, Unioni Monetar nuk do të ishte aleancë e vërtetë. Së paku nga ana psikologjike do të kishte paraqitjen e një shoqate të këmbimi valutor. Joshja për t’u lidhur më fort ekonomikisht dhe sidomos politikisht, do të ishte dobësuar shumë. Kjo do t’i kishte dhënë një goditje të rëndë idesë evropiane të dekadave të fundit. Vendet me peshë në BE do të përpiqen ta pengojnë këtë me të gjitha mjetet.