Për pesë sezone, Floriana Garo ka shoqëruar fundjavat e shqiptarëve me programin Jo vetëm modë, që erdhi përmes TV Klan si një revistë televizive ku i gjeje të gjitha, nga intervistat me personazhe të famshëm, te destinacionet e reja, projektet e bamirësisë, këshillat e ekspertëve dhe gjithçka lidhej me stilin e jetesës.
Mirëpo, duket se këtij kapitulli shumë të rëndësishëm në jetën e moderatores bukuroshe i erdhi fundi – së paku kështu raportojnë mediat në Shqipëri.
Si shkruan Who, pas një lidhjeje njëvjeçare në distancë me avokatin Enis Daci, Floriana ka vendosur të provojë Zvicrën, vendin ku do të jetojë tani e tutje, por pa e humbur përgjithmonë lidhjen me Shqipërinë.
Burime pranë saj tregojnë se ky është sezoni i fundit i Florianës në krye të Jo vetëm modë, në të cilin për pesë vite bëri si autoren, ashtu edhe moderatoren.
Pas pushimeve verore, pritet që Floriana, së bashku me partnerin e saj të udhëtojë drejt Gjenevës, ku do të nisë një kapitull të ri në jetën e saj.