I ngarkuari i Bashkimit Evropian (BE) për dialogun Kosovë-Serbi, Miroslav Lajçak pas takimit me ushtruesen e detyrës së presidentes, Vjosa Osmani ka thënë se ka ardhur në një Kosovë tjetër, duke aluduar nga rezultatet e zgjedhjeve të parakohshme parlamentare të 14 shkurtit.
Lajçak tha se zgjedhjet e fundit i kanë sjell mandat të fortë liderit të Lëvizjes Vetëvendosje (LVV) Albin Kurti dhe Vjosa Osmanit.
Ai po ashtu tha se ndjehet i gëzuar që të gjitha partitë politike kanë pranuar rezultatet e zgjedhjeve të fundit në vend.
“Do të shpresoja të vija më shpesh këtu. Kam ardhur në një Kosovë tjetër e cila ka ardhur nga përfundimi i zgjedhjeve dhe të cilat i kanë dhënë një mandat të fortë Kurtit dhe Osmanit. Shpreh përgëzimin tim që të gjitha partitë kanë pranuar rezultate nga përfundimi i zgjedhjeve”, ka thënë ai.
Lajçak po ashtu tha se e mbështet plan programin e Kurtit dhe Osmanit të cilat i kanë paraparë për Kosovën.
Ai gjithashtu tha se dialogu Kosovë-Serbi do të vazhdojë.
“Mesazhi i dytë, BE-ja dhe SHBA-ja janë në një partneritet dhe janë në marrëdhënie të afërt më shumë se ç’mund të parashihet. Mbështetja për programin elektoral të programit të Kurtit dhe Osmanit, BE-ja është e gatshme që të mbështes krijimin e vendeve të reja të punës, luftimin e korrupsionit… BE-ja dhe SHBA-ja presin vazhdimin e procesit të dialogut. Kisha një bisedë të gjatë me Kurtin dhe Osmanin se ku jemi me çështjen e dialogut dhe ku kemi arritur si dhe cilat janë hapat të cilat i parashohim. Dialogu do të vazhdoj, do të krijojmë disa procedura interne për vazhdimin e dialogut”, ka thënë ndër të tjera Lajçak. /Telegrafi/
