Kompania amerikane e bio-teknologjisë Moderna pritet të paraqesë sot kërkesën për të kërkuar miratimin e rregullatorit të SHBA-së dhe atij Evropian, për vaksinën e saj të coronavirusit në mënyrë që të rekomandohet për përdorim të gjerë.

Sipas BBC, përcjell Telegrafi, Administrata e Ushqimit dhe e Barnave do të shikojë të dhënat e testimit për vaksinën mARN dhe do të vendosë nëse është e sigurt dhe efektive për Autorizimin e Përdorimit Emergjent.

Një tjetër lajm i madh, vaksina e Moderna-s kundër coronavirusit rezultoi rreth 94.5 për qind efektive Një tjetër lajm i madh, vaksina e Moderna-s kundër coronavirusit rezultoi rreth 94.5 për qind efektive

Studimet klinike tregojnë se vaksina e Moderna-s është më shumë se 94 për qind efektive në mbrojtjen e njerëzve nga sëmundja e COVID-19.

Pfizer-i ka aplikuar tashmë për të marrë autorizimin për përdorim e vaksinës në SHBA, çka e vendos atë rreth një javë përpara Moderna-s.

Përveç aplikimit në SHBA, Moderna njoftoi se do të aplikojë për miratim me kusht edhe tek Agjencia Evropiane e Barnave, e cila tashmë ka filluar një rishikim të të dhënave dhe se do të vazhdojë bisedimet edhe me ente të tjera rregullatore.

Të dyja vaksinat si ajo e Moderna-s ashtu edhe ajo e Pfizer-it rezultuan më efektive sesa ishte parashikuar dhe efektiviteti i tyre është shumë më lartë sesa niveli prej 50 për qind përcaktuar nga Administrata amerikane e Ushqimit dhe Barnave.

Këshilltarët e pavarur të Administratës Amerikane të Ushqimit dhe Barnave kanë në plan të takohen në 17 dhjetor për të analizuar dhe dhënë rekomandimin e tyre për vaksinën e kompanisë Moderna. Ata do të takohen më 10 dhjetor për të shqyrtuar të dhënat e vaksinës së kompanisë Pfizer. /Telegrafi/