Njësitë e Forcave Sulmuese Ajrore të Ukrainës, përkatësisht parashutistët ukrainas kanë thënë se kanë shkatërruar një kolonë automjetesh ruse me municion.

Sipas Ukrinform, përcjell Telegrafi, deklarata përkatëse është bërë nga Forcat e Sulmit Ajror të Forcave të Armatosura të Ukrainës.

“Videoja përshkruan njësinë e raketave dhe artilerisë së Brigadës 95-të të Veçantë Sulmuese Ajrore duke shkaktuar me sukses një dëmtim në një kolonë automjetesh ruse me municion”, citohet të jetë thënë në raport.

Pamjet vijnë në ditën kur Ministria ruse e Mbrojtjes njoftoi se ka tërhequr trupat e saj nga Ishulli i Gjarprit, që e kishin pushtuar nga fillimi i luftës në Ukrainë.

Në deklaratën e tyre, rusët tentuan të shtiren si njerëz “të vullnetit të mirë”, duke pretenduar se po e bëjnë për t’i hapur rrugë korridoreve humanitare dhe eksportimit të drithërave të Ukrainës.

Por ushtria ukrainase ka dhënë një version tjetër, që duket se rusët nuk deshën që të bëhet publik. Sipas tyre, një operacion ushtarak i Kievit bëri që rusët të tërhiqen. /Telegrafi/