Nën kërcënimin e armës, ushtarët rusë i detyrojnë banorët e rajoneve të okupuara në Ukrainë të votojnë në referendume

Kremlini ka dërguar ushtarë të armatosur që të detyrojnë me forcë ukrainasit të votojnë në referendume, ku nën kërcënimin e armëve të trupave ruse, zyrtarët e rajoneve separatiste pro-rusë, po u shkojnë derë me derë banorëve për t’ju kërkuar të votojnë.

“Familja ime është detyruar të votoj nën kërcënimin e armëve të forcave ruse në referendumin në jug të Ukrainë”, tha Maxim Eristavi, gazetar dhe bashkëthemelues i Hromdaske International, televizion në Ukrainë, transmeton Telegrafi.

Ky gazetar ukrainas postoi videon që shfaq ushtarët e armatosur në korridorin e ndërtesës ku jeton familja e tij – duke i detyruar banorët e atjeshëm që me forcë të votojnë pro bashkimit me Rusinë.

Në anën tjetër, vendet perëndimore kanë akuzuar Rusinë për referendume ilegale në Ukrainë, si pretekst për aneksim të pjesëve të shtetit fqinj.

E Kievi e ka cilësuar si tentim të kot që Rusia të mbajë referendume në pjesët e pushtuara, tani që kundërofensiva ukrainase ka filluar të japë efekt.

Donetsku, Luhansku Zaporizhzhia, Khersoni dhe Krimea, që të gjitha në territorin e Ukrainës janë nën okupimin rus ku po mëtohet të mbahen referendumet për t’ju bashkuar Rusisë. /Telegrafi/