Shërbimi Spitalor Klinik e Universitar i Kosovës ka bërë të ditur se në Qendrën Klinikë Universitare të Kosovës dhe në shtatë spitalet e përgjithshme janë të shtrirë 282 pacientë të cilët janë të konfirmuar me COVID-19.

Këto të dhëna janë nxjerrë sipas raportit 24 orësh nga këto klinika ku thuhet se 160 pacientë janë duke u trajtuar në QKUK ndërsa, 122 në spitalet e përgjithshme.

Sipas po të njëjtit njoftim, thuhet se 17 pacientë me COVID-19 janë në gjendje kritike.

“Bazuar në raportin 24 orësh nga klinikat e QKUK-së dhe 7 spitalet e përgjithshme në SHSKUK janë të shtrirë ​ 282 pacientë të konfirmuar pozitiv me COVID-19. Në QKUK 160 pacientë,​ kurse 122 në spitalet e përgjithshme. Prej tyre, 103 në Klinikën Infektive, 39 në Pulmologji dhe 17 në njësinë intensive të mjekësisë sportive. Prej numrit total të pacientëve 122 pacientë janë me oksigjenoterapi në QKUK, kurse 69 në spitalet e përgjithshme. Në ShSKUK, janë 17 pacientë me Covid-19 në gjendje kritike, 4 prej tyre të intubuar”, thuhet në njoftim. /Telegrafi/