‘Institute for Technology and Society’, në bashkëpunim me Platforma Civikos dhe Agjencia për Informim dhe Privatësi po vazhdon me forcimin e kapaciteteve të zyrtarëve të institucioneve publike në nivel qendror dhe lokal në fushën e mbrojtjes së të dhënave personale.
Në njoftim thuhet se gjatë një programi dy-ditor trajnimi, pjesëmarrësit patën mundësinë të zhvillojnë njohuritë e tyre mbi standardet dhe praktikat më të mira për mbrojtjen e të dhënave, duke përmirësuar kështu sigurinë e informacionit në institucionet ku ata veprojnë.
“Në përfundim të trajnimit, pjesëmarrësit u certifikuan nga Treccert, duke përfituar njohje ndërkombëtare për aftësitë dhe ekspertizën e tyre në këtë fushë të rëndësishme”, thuhet në njoftim.
Ky aktivitet është pjesë e projektit “Fuqizimi i Mbrojtjes së të Dhënave Personale dhe Sigurisë Kibernetike në të gjithë sektorët në Kosovë”, i mbështetur nga Ambasada e Holandës në Kosovë.
“Me këto iniciativa, po kontribuojmë në ndërtimin e një mjedisi më të sigurt dhe të ndërgjegjësuar për rëndësinë e privatësisë dhe mbrojtjes së të dhënave në Kosovë”, thuhet tutje. /Telegrafi/
