Në Prishtinë është mbajtur takimi virtual i Komisionit të Përgjithshëm për Ekonomi, Infrastrukturë dhe Energji i Asamblesë Parlamentare të Procesit të Bashkëpunimit të Evropës Juglindore (SEECP), me temën “Sfidat ekonomike dhe mundësitë në vendet e EJL-së pas COVID-19”.
Ministrja e Ekonomisë, Artane Rizvanolli gjatë këtij takimi ka thënë se pandemia COVID‐19 është definuar si krizë botërore e shëndetit dhe sfida më e madhe me të cilën po përballet bota që nga Lufta e Dytë Botërore.
“Ajo nuk rrezikon vetëm shëndetin tonë, por ka goditur fuqishëm edhe ekonomitë e çdo vendi, duke sjellë me vete tronditjen e tretë dhe më të madhe ekonomike e financiare të shekullit XXI”, ka thënë Rizvanolli.
Ajo ka thënë se prioritet i Qeverisë së Kosovës është finalizimi i Strategjisë Kombëtare të Energjisë dhe i Planit Kombëtar për Energji dhe Klimë, rritja e zhvillimit ekonomik, bashkëpunimi me vendet e rajonit, etj.
“Konsideroj që bashkëpunimi regjional do të ketë rol shumë të rëndësishëm drejt rimëkëmbjes ekonomike e këtij tranzicioni si në vendin tonë, dhe përtej”, u shpreh ajo.
Drejtoresha menaxhuese e Odës Ekonomike Gjermano-Kosovare, Nora Hasani, prezantoi rezultatet e anketës vjetore të Dhomave të Tregtisë dhe Industrisë Gjermane mbi “Sfidat dhe mundësitë ekonomike në vendet e Evropës Juglindore (EJL) pas Covid-19“, duke krahasuar kështu ekonomitë e 16 shteteve pjesëmarrëse të EJL.
Po ashtu, edhe Umut Ergezer, prezantoi strategjinë “Zhvillimi i Qëndrueshëm ekonomik rajonal dhe roli i parlamenteve”, në kontekstin të Strategjisë 2030 për Evropën Juglindore (EJL).
Në këtë takim kryesuesja e Komisionit të Përgjithshëm për Ekonomi, Infrastrukturë dhe Energji të AP të SEECP-së, Jeta Statovci, ka prezantuar draft-raportin në lidhje me temën e takimit, për të cilën më pas kanë diskutuar edhe përfaqësuesit e vendeve pjesëmarrëse.
Draftraporti dhe draftrezoluta u mirëpritën nga delegacionet pjesëmarrëse, por në mungesë të kuorumit, nuk u arrit të miratohen. Të njëjtat do të procedohen në takimet tjera të Asamblesë, në kuadër të Sesionit Plenar, që do të mbahet nga 21-23 qershor në Turqi.
Përveç Kosovës, në këtë konferencë morën pjesë edhe delegacionet nga Shqipëria, Turqia, Sllovenia, Bosnja dhe Hercegovina, Maqedonia Veriore, Mali i Zi dhe Kroacia.