Trajneri i Interit, Roberto Mancini, ka thënë se Ever Banega është lojtari i ri i skuadrës së tij.
Ishte në ajër prej muajsh, por tashmë vetë trajneri i Interit, Roberto Mancini, e pranon se Interi e ka mbyllur me sukses blerjen e mesfushorit argjentinas të Sevillas, Ever Banega.
“Po, tani mund të quhet e mbyllur. Është një lojtar me cilësi dhe karakter, do të na ndihmojë”.
Objektiv madhor mbetet një sulmues klasi.
“Na mungon një sulmues? Një si Higuain i mungon edhe Juventusit, vetëm një fenomen arrin të shënojë 36 gola në një kampionat.
“Ibrahimovic? Nuk besoj, mendoj se e ka vendosur të ardhmen e vet dhe nuk do të jetë zikaltër. Mëkat, sepse është një lojtar që të ndryshon ndeshjen”.
Ai e pranon që edhe vetë do të qëndrojë në Inter edhe pse një thirrje nga Italia do ta bënte të mendonte.
“Besoj se do të qëndroj 100%. Klubi ka besim tek unë, kjo është vendimtare. Nëse më thërrasin kombëtarja, natyrisht që do të mendohesha gjatë, sepse nuk të vjen gjithnjë një rast i tillë”. /Telegrafi/