Kur fytyra “lahet” me 200 euro!

Gjersa me të madhe po propagandojmë se jemi gati për pranimin përfundimtar në arenat ndërkombëtare sportive, veprat tona dëshmojnë të kundërtën.

Dje Federata e Basketbollit të Kosovës (FBK) ka marrë notë të dobët sa i përket vlerësimit të gjesteve të pahijshme të lojtarëve, të cilët do të duhet të ishin shembull për gjenerata e ardhshme.

Në fakt, basketbollisti i “Sigal Prishtinës”, Dardan Berisha, ka pështyrë në fytyrë gjyqtarin e ndeshjes, Xhelal Muninin, duke mos u pajtuar me vendimet e tij në ndeshjen “Play-Off” kundër “Golden Eagle Yllit”.

Sado që mund të gabojnë gjyqtarët, kjo nuk e justifikon gjestin e ultë të lojtarit më të mirë të Ligës Ballkanike, i cili me këtë besoj se ka humbur simpatinë e shumë adhuruesve të basketbollit.

Por, ajo që të çudit është vendimi i Federatës së Basketbollit, e cila i ka shqiptuar një dënim – me plotë kuptimin e fjalës – qesharak.

Sipas FBK-së, pështymja e gjyqtarit kushton hiq më pak e as më shumë se 200 euro. Po, po, mirë lexuat!

Krerët aktualë të Federatës si duket po ndjekin standarde të dyfishta, apo thënë më shqip: disa basketbollistë janë më të privilegjuar se të tjerët!

Shembull është Valdet Grapci (ish basketbollisti i “Pejës”), i cili para disa viteve ishte përpjekur ta sulmonte një gjyqtar të ndeshjes. Komisioni Disiplinor i FBK-së atëherë kishte marrë vendim që ta dënojë me tre vjet të mos lojës. Tani ju mbetet juve ta peshoni dënimin e Berishës dhe të Grapcit.

Me këtë Federata ka humbur sensin dhe kredibilitetin para adhuruesve të basketbollit, pasi që ka nxitur basketbollistët tjerë që të veprojnë njëjtë me gjyqtarët edhe në të ardhmen, përderisa fytyra e gjyqtarit “lahet” me 200 euro.

Shtrohet pyetja: sa kushton me i pështy anëtarët e Komisionit Disiplinor apo vetë krerët e FBK-së? Garant me pezullim jetësor, pasi që sulmi ndaj shefave kushton shtrenjtë, ndërsa dinjiteti i gjyqtarit Munini, për FBK-në, si duket është baras me zero. Dje ju dhatë shembull se sa të pafuqishëm jeni në krahasim me klubet e mëdha. Prandaj, për fund do të doja ta dija se sa do të kushtonte rrahja e një gjyqtari, 220 apo 2500 euro?