Deputetja e Kuvendit të Kosovës nga radhët e Aleancës për Ardhmërinë e Kosovës, Donika Kadaj-Bujupi, ka kërkuar nga ministri i Shëndetësisë, Armend Zemaj, që të merr vendim për largimin e pagesës në hyrje të QKUK-së.

Deputetja tha se në këtë kohë të pandemisë është e tepërt që qytetarët të paguajnë për hyrje në QKUK, transmeton Telegrafi.

“Kërkoj që të hapen dyert e QKUK-së, pra të hiqen pagesat në hyrje. Të gjithë ne që e vizitojmë këtë institucion e dimë se që në fillim duhet të paguajmë 1 euro, e pastaj shtohen nga 50 centë. Në këtë kohë kur po shtohet varfëria është e tepërt të paguajnë qytetarët. Kërkoj nga Ministri Zemaj që sot asnjë ditë më larg të merr vendim dhe të shfuqizojë kërkesën për pagesë sa herë që hynë dhe dalin”, tha ajo në fjalimin e saj në Kuvend.

Kadaj-Bujupi po ashtu ka kërkuar nga ministri Zemaj që të pajisë me maska studentët e Universitet të Prishtinës, pasi që kanë marrë donacione të mjaftueshme. /Telegrafi/