Kryetari i Komunës së Vitisë, Sokol Haliti ka reaguar pas rastit tragjik në Pozharan ku humbën jetën 4 anëtarë të familjes Zuka.
Në reagimin e Komunës së Vitisë thuhet se institucionet komunale të prekura thellë me ngjarjen tragjike në Pozharan, ndërsa kanë shprehur ngushëllime të afërmeve të familjes Zuka.
“Rast i rëndë. Nuk mund të gjenden fjalë për ta përshkruar dhimbjen që na e solli lajmi i orëve të mbrëmjes në Pozheran, mbi tragjedinë familjare të familjes Zuka.
Shuarja e 4 qytetarëve tanë që gjetën vdekjen në këtë tragjedi, brenda shtëpisë së tyre, na ka prekur thellë. Ngjarjet e tilla tragjike, kur shuhet një familje e tërë, janë tepër të dhimbshme, si për qytetarët po ashtu edhe për Institucionet komunale.
Bashkë ndjejmë dhimbje me familjarët e të afërmit e familjes Zuka dhe u shprehim ngushëllimet më të sinqerta në emër të Institucioneve komunale të Vitisë dhe qytetarëve të kësaj komune”, thuhet në reagim.