I kujt do të jetë Liqeni i Gazivodës?

Stefano Sanino, drejtor i Drejtoratit për zgjerim të BE-së për gazetën Blic të Beogradit ka theksuar se prilli është vendimtar për marrjen e datës së Serbisë për bisedime për anëtarësim në BE.

Kjo do të thotë, ka thënë ai, se Serbia ka afat gjithsej një muaj e gjysmë që të arrijë marrëveshje për heqjen e institucioneve paralele, para së gjithash ato të sigurisë, pastaj të caktohen kompetencat e komunave për të cilën gjë janë marrë vesh kryeministrat Dacic e Thaçi.

“Asnjë marrëveshje e arritur deri më tash nuk është precizuar deri në fund dhe kjo është lënë kështu me qëllim që Prishtina dhe EULEX-i të mund të interpretojnë tekstin si të duan”, ka thënë për “Blic” Krstimir Pantic, zëvendësdrejtor i Zyrës së Serbisë për Kosovën.

“Nuk janë arritur detajet teknike e logjistike rreth oficerëve për ndërlidhje e data e shkuarjes së Dejan Pavicevicit në Prishtinë po prolongohet vazhdimisht”, ka thënë ai, transmeton “Koha”.

Nga Beogradi e Prishtina pritet të arrihen dy marrëveshje të reja: për rrymën dhe prefiksin telefonik.

Bisedimet nuk janë fare të thjeshta pasi në pyetje janë resurset strategjike në të cilat shteti i Serbisë ka investuar (!) miliarda euro me kredi që ende i kthen. Pyetje është se kujt do t’i takojë trafostacioni Valaç, penda dhe liqeni i Gazivodës te Zubin Potoku në veri, pyetet “Blic” .

Bashkësia ndërkombëtare insiston që kjo të jetë pasuri e Kosovës, sepse Kosova nuk mund të ekzistojë si shtet nëse është me varshmëri energjetike. As çështja e telefonit nuk është vetëm çështje ekonomike.

Serbia vlerëson se vlera e patundshmërive “të saj” në Kosovë është rreth 220 miliardë dollarë!. /Telegrafi/