Profesori i Historisë, Arbër Hadri ka folur për rëndësinë e vendimit të Gjykatës Ndërkombëtare të Drejtësisë, për ligjshmërinë e Pavarësisë së Kosovës, sot kur shënohen 11 vjet nga kjo ngjarje.

Hadri, vendimin e ka komentuar në aspektin historik.

“Normalisht shumë i rëndësishëm, në aspektin ligjor e juridik, por, në aspektin historik kjo ngjarje do thosha ka rëndësinë tepër të madhe, tepër të veçantë. Në historinë më të re jo veç të Kosovës, por edhe kombëtare, ne kemi ngjarje të rralla të  mëdha si kjo të fitoreve ndërkombëtare në histori. Normalisht akti ka qenë një autogol që Serbia ja bëri vetës duke bërë pyetje e cila mori përgjigje në anën e drejtë. E drejta e Zotit u konfirmua”, tha Hadri.

Ai për ‘RADIO 1’ foli edhe rreth padisë ndaj Serbisë për gjenocid.

“Tani këto dy raste dallojnë diametralisht, por, këto dy raste nëse pyesni, e kanë vetëm një të përbashkët të fuqishme, viktimën dhe agresorin që janë të njëjtit. Në aspektin historik dhe gjithë dimensional Serbia botërisht dihet se ka kryer gjenocid, e se a duhet në këtë moment të ndodhë padia, do thosha më mirë kjo të gjykohet dhe mendohet nga diplomacia jonë shtetërore si momentum. Historia ka fakte të gjenocidit, ndërsa, sa shteti është gati dhe ka potencial mbetet të flasë vet shteti”, tha Hadri.