Në kryeqytetin e Serbisë, Beograd, gjatë natës së 7 korrikut ka shpërthyer protesta e dhunshme, si rezultat i masave të reja mbrojtëse kundër coronavirusit që janë marrë nga qeveria e këtij vendi.

Protestuesit ua kanë vënë zjarrin kontejnerëve të mbeturinave që i kanë shpërndarë nëpër rrugë, duke shkatërruar shenja të komunikacionit, hedhur gurë dhe ndezur vetura të policisë, transmeton Telegrafi.

E pas disa orëve “orvatje”, policia ka arritur të shpërndajë protestuesit që tentuan të futen në Kuvendin e Serbisë, duke përdorur gaz lotsjellës.

Por edhe pse arritën të shpërndajnë turmën para Kuvendit, njësitë speciale të policisë së Serbisë kanë qëndruar para dyerve të këtij objekti deri në mëngjes nga frika se protestuesit mund të rikthehen.

Drejtori i policisë Vladimirm Rebiq, ka deklaruar gjatë protestës së mbrëmshme në Beograd janë lënduar të paktën 43 policë si dhe 17 demonstrues, duke mos anashkaluar të dhënat për numrin e të arrestuarve, duke theksuar se dhjetëra prej tyre janë prangosur.

Ai i ka cilësuar si iniciatorë të futjes në objektin e Kuvendit të Serbisë, Damjan Knezheviq dhe Srxhan Nogan, duke pranuar se vetëm Knezheviqit është arrestuar. Sa i përket Nogas, policia po pret të konsultohet me gjykatësit nëse ka pasur elemente të ndonjë vepre penale.

Video të ndryshme amatore të filmuara nga kjo protestë ngjajnë shumë me skenat kaotike të filmave të Hollywood-it, ku nuk është kursyer asgjë, pas vendimit të presidentit serb Aleksandar Vuçiq i cili vuri masa të reja pas rritjes enorme të rasteve të reja me COVID-19.

Madje në disa video shihen rrugët me gjak, ku pas përleshjes mes policisë dhe demonstruesve rrugët janë shndërruar në arenë “konfrontimi”. Në protestë kanë marrë mijëra qytetarë nga Serbia që “pushtuan” të gjitha rrugët që qonin drejt Kuvendit të Serbisë. /Telegrafi/