Nëpërmjet tre padive civile, secili prej tyre i është drejtuar Gjykatës së Tiranës duke i kërkuar gjyqësorit që të pezullojë dekretin e presidentit Bujar Nishani të datës 21 maj, si dhe të pezullojë urdhrin e ministrit të Mbrojtjes Arben Imami për lirim nga detyra.
Në të tri paditë argumentohet se gjyqësori duhet të urdhërojë rikthimin në Forcat e Armatosura, pasi sipas gjeneralëve dekreti i presidentit është i pambështetur në ligj dhe urdhri i ministrit Imami është jashtë procedurave ushtarake, raporton Top Channel.
Mësohet se padia e ish-zëvendësshefit të Shtabit të Përgjithshëm, Sandër Lleshi, do të gjykohet nga gjyqtari Shkëlqim Mustafa, ndërkohë që gjyqtarja Enkelejda Metaliaj do të gjykojë kërkesë-padinë e gjeneralit Dhori Spirollari, ish-komandant i Forcave Ajrore dhe gjyqtarja Fahrie Budo çështjen e gjeneralit tjetër Abaz Lleshi, ish-komandant i mbështetjes rajonale.
Pas dekretit të presidentit tre gjeneralët reaguan duke lëshuar akuza të forta ndaj kreut të shtetit dhe ministrit të Mbrojtjes, me argumentat se shkarkimi i tyre ishte i paligjshëm, në një kohë që denoncuan se në të njëjtën mënyrë është vepruar edhe me dhjetra ushtarakë të tjerë profesionistë. /Telegrafi/
