Me pankarta në duar me anë të së cilave kërkuan lirimin e masave antiCovid, gastronomet e Kosovës protestuan para objektit të Qeverisë.
Me pankarta “Krejt dhe padrejtë”, “Padrejtësia. Padrejtësi” dhe “Nëpërkëmbje”, një numër i madh i gastronomëve janë mbledhur sot para Qeverisë.
Motoja e protestës ishte “me një vaksinë nuk çel vera”.
Gastronomët kërkuan lirimin e masave dhe heqjen e kufizimit të lëvizjes.
Kryetari i gastronomeve Petrit Kllokoqi ka thënë se nuk kanë dalë për të rrëzuar qeverinë por e kundërta, për t’ia hapur sytë kësaj qeverie.
“Mos i largoni masat vetëm për fushata. Kjo nuk është fer. Masat më nuk kanë sens. Hiqni masat. Nesër kur të vijnë zgjedhjet lokale nuk është fer të largohen masat. Shtetet në rajon kanë bërë plane për verën e ne po punojmë me distanca. Masat më nuk janë zgjidhje. Hiqeni kufizimet dhe kthejeni shyhretin në vendin tonë. Tash e kemi mundësinë”, deklaroi Kllokoqi.
Arian Vranica, sekretar në Shoqatën e Gastronomëve të Kosovës ka thënë se derisa shtetet tjera janë duke bërë gara kush po udhëheq me turizmin, në Kosovë duhet të bëhen protesta për hapje .
“Të gjithë ne sot që jemi këtu kemi bindje të ndryshme politike, por të gjithë kemi interes të përbashkët të mbrojmë interesat e bizneseve tona. Sot bëhen 430 ditë që jemi duke u ballafaquar me këtë pandemi. Këto masa na përcollën me humbje të jashtëzakonshme. Jemi duke e rrezikuar periudhën më të rëndësishme të vitit për gastronominë e ekonominë. Përderisa shtetet tjera janë duke bërë gara kush po udhëheq me turizmin ne po qëndrojmë në vend”.
Vranica ka kërkuar heqjen e masave, lejimin e mbajtjes së dasmave e kërkesa tjera të ngjashme.
Ditë më parë për Telegrafin, Vranica u shpreh se marrëveshja e nënshkruar nga Ministri i Shëndetësisë, Arben Vitia, ministrja, Rozeta Hajdari, dhe disa shoqata nuk është respektuar, pasi as tash kur është përmirësuar gjendja epidemiologjike nuk janë hequr masa për një pjesë të sektorit të gastronomisë, të cilët janë të mbyllur që nga 13 marsi 2020.
Gastronomët paralajmëruan se mos dëgjueshmëri ndaj institucioneve të shtetit dhe mosrespektim të masave antiCOVID-19, nëse nuk merren parasysh me urgjencë kërkesat e kamotshme të tyre.
Kujtojmë se nesër ministri i Shëndetësisë, Arben Vitia do t’i diskutojë masat e reja antiCovid, me kryetarët e komunave të vendit, aty pritet të diskutohet edhe plani i vaksinimit dhe gjendja e përgjithshme pandemike në Kosovë.
Situata epidemiologjike
Instituti Kombëtar i Shëndetësisë Publike në Kosovë (IKSHPK) ka regjistruar të martën një viktimë me coronavirus.
Sipas këtij institucioni, në 24 orët e fundit janë regjistruar 11 raste të infektimit me këtë virus, pas testimit të 3,291 mostrave.
IKSHPK-ja ka njoftuar se më 25 maj janë shëruar 258 pacientë nga sëmundja COVID-19, që shkakton koronavirusi, derisa raste aktive janë 3,303.
Prej 13 marsit 2020, kur janë regjistruar rastet e para të infektimit, autoritetet shëndetësore në Kosovë kanë regjistruar 101,725 pacientë me këtë virus.
Prej tyre 2,241 kanë vdekur.
Në Kosovë është në zhvillim e sipër faza e dytë e vaksinimit, ku bëjnë pjesë personat e moshës 65-79 vjeç.
Në fazën e parë që ka nisur në fund të marsit, përparësi u është dhënë punonjësve shëndetësorë dhe personave mbi 80 vjeç.
Në fazën e tretë, ndërkaq është thënë se do të vaksinohen 50 për qind e qytetarëve.
Kosova po zhvillon fushatën e imunizimit me vaksina të dhuruara nga Organizata Botërore e Shëndetësisë dhe Bashkimi Evropian.
Ky vend nuk ka të nënshkruar asnjë kontratë për blerje vaksinash nga ndonjë kompani farmaceutike. /Telegrafi/
