Të dy sukseset e hendbollistes së re kosovare kanë të bëjnë me olimpizmin.
19-vjeçarja vjet me Suedinë mori pjesë dhe fitoi medalje në Lojërat Olimpike për të rinj që u mbajtën në Nanjing të Kinës. Tash ëndërron që me Suedinë të paraqitet në Lojërat e vërteta Olimpike, ato për sportistët seniorë. Albana e di që ka pak gjasa të luajë për Suedinë në "Rio 2016", por është e vendosur që të jetë pjesë e Lojërave Olimpike të vitit 2020.
"Si sportistë zakonisht krijojmë disa ëndrra. Pjesëmarrja në Lojërat Olimpike për të rinj nuk ka qenë as pjesë e ëndrrave të mia. Natyrisht kjo përvojë ka qenë dhe është ende kulmi i të arriturave të mia në hendboll. Fakti që pos pjesëmarrjes jam stolisur edhe me medalje olimpike, e bën këtë fakt edhe më të rëndësishëm", ka thënë Arifi në një bisedë për gazetën Koha Ditore.
Ajo ka mbetur e impresionuar me organizimin që kanë bërë kinezët për Lojërat Olimpike verore për sportistë të rinj.
"Si duket kinezët dinë shumë mirë të organizojnë ceremoni dhe ngjarje të kësaj përmase. Hapja dhe mbyllja e Lojërave Olimpike për të rinj do të më mbetet një prej kujtimeve më të bukura".
Për Albanën, paraqitja në Lojërat Olimpike tash është synimi kryesor në karrierën sportive.