“EC Ma Ndryshe” publikon platformën online për muzetë e Kosovës

Organizata joqeveritare “EC Ma Ndryshe” të hënën ka publikuar platformën online Muzeu.info dedikuar muzeve në Kosovë.

Sipas njoftimit qëllimi është që muzetë të jenë më të qasshme për qytetarët dhe turistët.

“Në këtë platformë, aktualisht ofrohen informata për muzetë aktive në Prishtinë, Prizren, Mitrovicë dhe Gjakovë, përfshirë llojin e muzeut, artefaktet e ekspozuara, lokacionin, orarin e punës, kontaktet, etj. me qëllim që ato të jenë më të qasshme për qytetarët dhe turistët”, thuhet në njoftim, raporton Telegrafi.

EC Ma Ndryshe ka bërë të ditur se përmes kësaj platforme synohet promovimi i muzeve të Kosovës, rritja e numrit të vizitorëve, orientimi më i lehtë i turistëve, sikurse edhe digjitalizimi i të dhënave të hulumtuara.

Kjo organizatë ka shtuar se në mënyrë të vazhdueshme do ta pasurojë platformën me informata të duhura për muzetë në Kosovë, raporton Telegrafi.

Aktiviteti në fjalë është realizuar në kuadër të projektit “Trashëgimia kulturore për të gjithë: Ruajtja, edukimi, zhvillimi dhe inovacioni”, që përkrahet nga Ministria e Kulturës, Rinisë dhe Sportit. /Telegrafi/