A e ka shpëtuar vaksina kundër tuberkulozit Ballkanin nga më e keqja e coronavirusit?

Një cep i Evropës e njeh më mirë rrezikun e viruseve sesa shumica e vendeve të tjera.

Jugosllavia u ballafaqua me tuberkuloz endemik në jetën e saj të shkurtër, duke mos harruar edhe të tjera si fruthin.

Dhe kështu, kur COVID-19 arriti në Ballkanin Perëndimor në fund të shkurtit, rajoni u përgatit për më të keqen.

Megjithatë, në të shtatë vendet e ish-Jugosllavisë, me popullsinë e tyre totale prej 22 milionë banorëve, ka pasur vetëm 21.145 raste të konfirmuara të sëmundjes dhe 775 vdekje, pavarësisht afërsisë së rajonit me Italinë dhe sistemeve të dobëta të kujdesit shëndetësor.

Në këtë drejtim, Thetimes.co.uk, ka bërë një shkrim, sipas të cilit ekziston një besim në rritje midis disa shkencëtarëve se arsyeja pse këto vende nuk janë goditur aq keq mund të qëndrojë në ato pandemitë e kaluara, dhe konkretisht në përgjigjen e tyre: vaksinimi afatgjatë, universal dhe, në disa vende, i detyrueshëm, përcjell Telegrafi.

Për vite me radhë shkencëtarët po mendojnë pse vaksina e Bacillus Calmette-Guérin (BCG), një imunizim i lirë kundër tuberkulozit që gati një shekull, gjithashtu mund të ndihmojë kundër sëmundjeve të tjera infektive.

Por me pandeminë e coronavirusit, punës së tyre i është dhënë një impuls i ri nga përvojat e vendeve si ish-Jugosllavia.

“Kjo është diçka që ne kemi parë duke ndodhur: njerëzit që kanë marrë BCG kanë një formë [të COVID-19] që është më e lehtë”, ka thënë Predrag Kon, epidemiologu shtetëror i Serbisë. “Këto janë thjesht përshtypje, dhe ende nuk ka prova të mjaftueshme. Por duket se vendet me vaksinime universale BCG kanë pasur një përvojë më të lehtë me COVID-19”.

Siç thuhet në shkrimin e mediumit britanik, Mbretëria e Bashkuar dhe shumica e Evropës perëndimore larguan vaksinimet universale të BCG në vitet 2000, dhe asnjëherë nuk është dhënë në mënyrë universale në Itali apo SHBA.

Në pjesën më të madhe të Afrikës, Evropës Lindore, Azisë dhe Amerikës së Jugut, megjithatë, ajo akoma administrohet në mënyrë rutinore.

Por Jugosllavia dhe shtetet pasardhëse të saj kanë qenë ndër vaksinuesit më entuziastë, përcjell Telegrafi.

Tuberkulozi u paraqit në të gjithë vendin në fund të Luftës së Dytë Botërore, me deri në 15 për qind të popullsisë të infektuar çdo vit.

Më 1946 qeveria Jugosllave filloi të testojë të gjithë rekrutët e ushtrisë dhe cilindo nën moshën 25 vjeç, dhe duke imunizuar ata që tregohen se janë të prekshëm.

Në 1949 vaksinimi BCG u bë i detyrueshëm për të gjithë nën 25 vjeç në Jugosllavi, dhe që nga ajo kohë administrohet në mënyrë universale.

Që nga vitet 1950 studiuesit kanë ditur që BCG gjithashtu përmirëson imunitetin e përgjithshëm, megjithëse vetëm kohët e fundit ata kanë filluar të kuptojnë pse.

Sidoqoftë, si gjithmonë, është e vështirë të nxjerrësh përfundime pa pasur shifra të besueshme për rastet aktuale të coronavirusit – dhe në rastin e vendeve të Ballkanit ka pikëpyetje të mëdha për shtrirjen e testimit.

Shpejt pasi Bacillus Calmette-Guérin (BCG) u prezantua për të trajtuar tuberkulozin (TB) në Evropë në vitet 1920, studiuesit vunë re se ajo zvogëlon fuqimisht vdekshmërinë e foshnjave.

Gjithsesi, në mënyrë thelbësore, këto efekte nuk mund të shpjegohen me një rënie të tuberkulozit vetëm.

Gjithsesi, “dikush mund të shpjegojë këtë vdekshmëri shumë të ulët midis fëmijëve të vaksinuar nga ideja se vaksina BCG provokon një imunitet jospecifik”, shkroi një studiues suedez në vitin 1932.

Studimet e mëvonshme sugjeruan që vaksina mund të mbronte kundër infeksioneve të traktit respirator, për të cilat viruset janë shkaku më i zakonshëm.

Hulumtimet e kryera në Guinea-Bissau, në Afrikën perëndimore, që u botuan në 2005 përforcuan lidhjen: BCG zvogëloi incidencën e virusit syncytial të frymëmarrjes, i cili shkakton simptoma të ngjashme me të ftohtët dhe mund të jetë serioz për fëmijët e vegjël dhe të moshuarit.

Dy vjet më parë, një studim i Afrikës së Jugut zbuloi se vaksinimi zvogëlonte infeksionet e frymëmarrjes tek adoleshentët me 70 për qind.

Në një punim të botuar muajin e kaluar në revistën Nature Immunology, një ekip studiuesish shqyrtoi këto rezultate ndër të tjera dhe përfundoi: “Vaksina për BCG mund të jetë një urë lidhëse për një vaksinë specifike për COVID-19”.

Shkencëtarët besojnë se BCG duket se stërvit trupin për të bërë një përgjigje më të shpejtë kur takon një mikrob të dëmshëm. Dhe më e rëndësishmja, kjo nuk kufizohet vetëm në bakteret që shkaktojnë tuberkulozin. /Telegrafi/