Banorët e San Franciskos mbetën të habitur, kur u zgjuan në mëngjes dhe panë qiellin që kishte marrë ngjyrë të portokalltë dhe po i fërkonin sytë nga hiri që binte nga lartë, duke pyetur veten nëse janë zgjuar në një planetë tjetër.
Madje disa menduan se bëhej fjalë për një ëndërr të keqe kështu u kthyen në shtrat, shkruan San Francisco Chronicle. Madje disa nxënës janë vonuar në shkollë pasi kishin fjetur më shumë se që duhet, për faktin se jashtë ishte errësirë, transmeton Telegrafi.
Por pas daljes në terren të ekspertëve, është konstatuar se fenomeni i “qiellit me ngjyrë portokalli” është shkaktuar nga retë me tym të vatrave të zjarrit që janë përhapur në tërë Kaliforninë.
E meteorologët kanë shpjeguar se si drita e diellit mund të zhduket plotësisht, kur tymi dhe hiri shfaqen nga vatrat e mëdha të zjarrit. /Telegrafi/
