Deputeti i Lëvizjes Vetëvendosje, Fitim Uka ka njoftuar se ka rezultuar pozitiv me COVID-19.
Uka ka thënë se simptomat e COVID-19, i janë shfaqur që nga dita e diel, transmeton Telegrafi.
“Të dashtun, që nga e diela më janë shfaqur simptoma të Covid-19. Me rekomandim të mjekut jam izoluar dhe kam respektuar këshillat me përpikëri. Pak më herët kam pranuar telefonatën nga Instituti Kombëtar i Shëndetit Publik, për të më konfirmuar se rezultati i testit tim për Covid-19 është pozitiv. Sikurse unë, edhe Yllka ka simptomat e njëjta. Ndërkaq, në këtë periudhë izolimi, për ne po kujdeset Bindi, me dashni e ‘këshilla profesionale’. Ju falënderoj të gjithëve për dashninë dhe kujdesin që po tregoni për ne në këtë periudhë jo të lehtë”, ka shkruar ai në Facebook.
Deputeti ka thënë se “kushdo që ju thotë se është lehtë të ballafaqoni Covid-19, ju gënjen”.
“Kështu që, ndiqni rekomandimet e IKSHPK-së dhe ruani shëndetin tuaj dhe të familjes”.
Ndryshe, në Kosovë numri i personave të infektuar me COVID-19 ka arritur në 6 mijë e 286 raste, prej tyre 3 mijë e 369 janë shëruar kurse janë regjistruar 150 raste të vdekjes të cilët kanë pasur sëmundje tjera shoqëruese. /Telegrafi/
