Dixhitalizimi i librave ka disa ditë që është bërë shkas për debat në mes OBRM-PDUKM-së dhe ministres së Arsimit, Milla Carovska.
Carovska në pyetje deputetësh ia përmendi OBRM-PDUKM-së se në programin parazgjedhor edhe ata e kishin dixhitalizimin e librave.
“Po dua të ju them se sot çfarë bëni, dhe kjo është programi i juaj ku keni garuar në zgjedhje dhe i keni gënjyer qytetarët sepse sot po flisni kundër dixhitalizimit modernizimit për ndryshimin e sistemit arsimor, ndërsa më herët në programin e juaj. Në projektin 14 më falni dhe në projektin 15 nëse nuk gabohem është dixhitalizimi platforma për mësim elektronik”, deklaroi Carovska.
Por sot partia e OBRM-PDUKM-së ka dalë me konferencë për media duke theksuar se ato asnjëherë nuk kanë thënë që janë kundër dixhitalizimit, ndërsa thonë se kjo tregoi se ministrja po i ndjek kumtesat e tyre.
“Ajo si të kishte dëgjuar për së pari herë se OBRM-PDUKM në programin parazgjedhor ka pasur edhe dixhitalizimin në sistemin arsimor. Kjo nuk është e saktë, në deklaratën e ministres është e qartë se shërbimet e saja por edhe ajo intensivisht i përcjellin kumtesat tona”, tha Marija Miteva nga OBRM-PDUKM.