Angjushev në Selanik: Mbetemi të përkushtuar në integrimet euro-atlantike

Zv. kryeministri për Çështje Ekonomike, Koço Angjushev mori pjesë në panelin “Evropa Juglindore, Sfidat dhe Perspektivat”, në kuadër të Samitit të Selanikut.

Ai në këtë samit tregoi se Qeveria e Republikës së Maqedonisë së Veriut mbetet e përkushtuar ndaj reformave që ndërlidhen me negociatat me Bashkimin Evropian, pavarësisht vendimit të fundit të BE-së, si dhe anëtarësimit në NATO, mbi të gjitha për të siguruar sundimin e ligjit, stabilitetin dhe zhvillimin ekonomik të vendit dhe një jetë më të mirë për qytetarët.

“Republika e Maqedonisë së Veriut ka ndërmarrë të gjitha hapat e nevojshëm për të marrë datën për hapjen e negociatave, megjithatë BE ka marrë një vendim i cili është pjesërisht zhgënjyes dhe i lidhur me proceset që ndodhin brenda BE-së. Ne mbetemi të përkushtuar për integrimin euro-atlantik, të cilën e konsiderojmë se sjellin stabilitet dhe prosperitet. Anëtarësimi në NATO tashmë është i sigurt dhe shpresojmë se do të jetë e mundur deri në fillim të vitit 2020, kur presim që Kuvendi i Mbretërisë së Spanjës të ratifikojë protokollin për pranimin e Maqedonisë së Veriut në NATO”, tha Angjushev.

Ai shtoi se për të përshpejtuar zhvillimin rajonal, kërkohet angazhim dhe përfshirje e plotë, veçanërisht në integrimin evropian të të gjitha vendeve të rajonit.

Zv. kryeministri vlerësoi marrëveshjet e Republikës së Maqedonisë së Veriut me Greqinë dhe Bullgarinë si një shembull i mirë për tejkalimin e çështjeve të hapura bilaterale dhe theksoi se ato kanë një efekt pozitiv në bashkëpunimin ekonomik./Telegrafi/