Italia po heton katër prodhuesit më të mëdhenj të automjeteve elektrike

Trupi italian për mbrojtjen e konkurrimit (AGCM) ka nisur një hetim kundër BYD, Stellantis, Tesla dhe Volkswagen për dyshime për mashtrim të konsumatorëve lidhur me performancat e veturave të tyre elektrike.

Hetimi fokusohet në praktikat komerciale të mundshme të padrejta që lidhen me informacionet mbi arritjen e distancës, degradimin e kapacitetit të baterisë dhe kufizimet e garancive standarde për bateritë, që mund të përbëjnë shkelje të Kodit të Konsumatorit italian.

Sipas AGCM, faqet e internetit të këtyre prodhuesve ofrojnë “informacione të përgjithshme dhe ndonjëherë kontradiktore” lidhur me arritjen e distancës së automjeteve elektrike, pa specifikuar qartë faktorët që mund të ndikojnë në distancën maksimale të reklamuar, si kushtet e motit ose lloji i rrugës.

Po ashtu, është shprehur shqetësim për mungesën e detajeve lidhur me degradimin e baterisë gjatë kohës dhe kushtet e garancisë.

Stellantis ka deklaruar se po bashkëpunon plotësisht me autoritetet kompetente dhe ka dorëzuar tashmë përgjigjet, informacionet dhe dokumentacionin e nevojshëm. BYD dhe Volkswagen kanë refuzuar të komentojnë hetimin, ndërsa Tesla nuk ka dhënë një përgjigje menjëherë për kërkesën për koment.

Për zakonin e këtyre rasteve, AGCM, me ndihmën e njësisë speciale të policisë financiare Guardia di Finanza, ka kryer inspektime në selitë italiane të këtyre katër prodhuesve të makinave. Sipas legjislacionit italian, shkelja e të drejtave të konsumatorëve mund të rezultojë në gjoba që variojnë nga 5000 deri në 10 milionë euro. /Telegrafi/