Rama i përmendi emrin 21 herë, Afrim Krasniqi i përgjigjet: Shqipëria ka zyrtarë të papërgjegjshëm

Analisti Afrim Krasniqi, nga Instituti i Studimeve Politike, ishte i ftuart në A2 CNN ku foli rreth dëgjesës në grupin e Partisë Socialiste me rektorin e Universitetit Bujqësor, Sallaku, ku kryeministri Rama reagoi edhe në lidhje me një status të publikuar prej tij, se diçka e tillë ishte e pazakontë dhe në shkelje të ligjit.

Sipas Krasniqit, Shqipëria është i vetmi vend ku partia në pushtet merr rolin e një gjykate apeli për një dosje të veçantë duke shtuar kjo tregon se vendi ynë ka zyrtarë të papërgjegjshëm.

Lexo po ashtu SPAK me 24 masa sigurie për zyrtarët e Universitetit, Rama thërret rektorin në mbledhje partie, politologu Krasniqi: Absurde dhe shkelje kushtetuese, ligjore

“Mendoj që kryeministri u përpoq t’i jepte përgjigje shqetësimit tim dhe në fakt konfirmoi gjithçka që unë kam thënë. Sepse Shqipëria është i vetmi vend në një botë demokratike ku partia në pushtet, përfshirë kabinetin qeveritar, thërret dhe merr rolin e një Gjykate të Apelit dhe vë në gjykim një dosje. Kjo nuk ka ndodhur ndonjëherë dhe është e paimagjinueshme të ndodhë. Kryeministri u përpoq të thoshte se nuk po bënte gjë.

Kryeministri harxhoi 1 orë kohë për të denigruar këdo që mendon ndryshe. Sot më përdori emrin 21 herë, e bën, është mjeshtër i denigrimit. Më shqetëson që Shqipëria ka zyrtarë të papërgjegjshëm. Ky mesazh na jep kurajo për të vazhduar dhe tregon sesi do të jetë fushata elektorale”, tha Krasniqi. /Telegrafi/