Bytyqi: Dënimi më i madh për Serbinë, detyrimi për të zbatuar marrëveshjen e Ohrit

Profesori Seb Bytyqi, është i mendimit se Kosova ende nuk është kthyer në dialog me Serbinë.

Sipas tij takimi i radhës do të ndodhin me liderët e Bashkimit Evropian dhe se takim sy më sy mes Albin Kurtit e Aleksandar Vuçiqit nuk do të ketë.

Bytyqi, tha se Serbia mund të dënohet por që sipas tij kjo mund të marrë kohë. Dënimi më i madh ndaj Serbisë sipas tij do të ishte një plan sekuencimi i marrëveshjes së Ohrit, që do i shkonte në favor Kosovës.

“Takimet që do ndodhin në Bruksel, janë me liderë të BE-së, jo mes Kurtit e Vuciq, nuk ka kthim në dialog ende. Çështja e dënimit të Serbisë do të marrë kohë, por substancialisht, dënimi më i madh për Serbinë është që nëse arrihet një plan sekuencimi në favor për Kosovën. Nëse arrihet zbatimi i pikës 7 në favor të Kosovës, do ishte dënimi më i madh ndaj Serbisë. Nuk do duhej të kishte dënim sa për sy e faqe, para arritjes së një marrëveshje për sekuencim për pikën 7, sepse pastaj do përkthehej një plan sekuencimi më pak të favorshëm për Kosovën”, tha ai në RTV Dukagjini.

Sipas tij Kosova nuk duhet të fokusohet shumë në sanksionet kundër Serbisë për shkak se kjo mund pastaj të kthehet në favor për ta.

“Bashkësia ndërkombëtare dëshiron balancë, nëse merren masa ndaj Serbisë, atëherë mund të merren edhe masa tjera që shkojnë në favor të Serbisë”, tha ai.

Tutje ai tha se Kosova e ka pranuar planin për të ecur përpara, por që sipas tij nuk mund të pritet nga shteti ynë t’i zbatojë marrëveshjet pa i zbatuar Serbia.