Numri i të vdekurve nga tërmeti rritet në afro 4900 në Turqi dhe Siri

(E plotësuar) Të paktën 4,890 vdekje janë konfirmuar tani në Turqi dhe Siri pas një tërmeti të fuqishëm me magnitudë 7.8 ballë që tronditi rajonin herët të hënën.

Numri i të vdekurve në Turqi u rrit në të paktën 3,381 deri rreth orës 9:45 të mëngjesit me orën lokale të martën, tha në një konferencë televizive Orhan Tatar, një zyrtar i agjencisë së menaxhimit të fatkeqësive të vendit.

Të paktën 20,426 të lënduar janë raportuar gjithashtu, sipas Tatar.

Deri më tani, 11,000 ndërtesa janë raportuar të dëmtuara në Turqi, tha ai.

Gati 25,000 reagues emergjence po punojnë në zonat e prekura, shtoi ai.

Sipas tij, ekipet e shpëtimit po përdorin të paktën 10 anije dhe 54 aeroplanë për të transportuar të lënduarit dhe për të ndihmuar në operacionet e kërkimit.

Ndërkohë në Siri, numri i të vdekurve është rritur në 1,509 në zonat e kontrolluara nga qeveria dhe opozita, thanë zyrtarët.

Sipas tyre, të paktën 3,548 persona janë raportuar gjithashtu të lënduar në Siri. /Telegrafi/

Numri i viktimave nga tërmeti shkatërrues në Turqi dhe Siri rritet në mbi 4,300

Më shumë se 4,300 njerëz humbën jetën dhe 15 mijë u lënduan në Turqi dhe mbi kufirin në Suri pas tërmetit shkatërrues në orët e para të së hënës.

Ekipet e shpëtimit po luftojnë me shi dhe borë të dendur, derisa mobilizohen për të gjetur të mbijetuar në Turqinë juglindore, transmeton Telegrafi.

Organizata Botërore e Shëndetësisë ka paralajmëruar se numri mund të rritet në mënyrë dramatike pasi ekipet e shpëtimit gjejnë më shumë viktima.

Shumë njerëz në zonën e fatkeqësisë kanë qenë shumë të frikësuar për t’u kthyer në ndërtesa.

Tërmeti me magnitudë 7.8 ndodhi të hënën në një thellësi prej 17.9 kilometrave pranë qytetit të Gaziantep, sipas Shërbimit Gjeologjik të SHBA.

Sizmologët thonë se ishte një nga më të mëdhenjtë e regjistruar ndonjëherë në Turqi, ku të paktën 2,921 njerëz dihet se kanë vdekur tani. Të mbijetuarit thonë se u deshën dy minuta që lëkundjet të ndalonin.

Një lëkundje e mëvonshme kishte një magnitudë 7.5 ballë dhe epiqendra e saj ishte në rrethin Elbistan të provincës Kahramanmaras.