Xhaferi: Pa vonesa, Maqedonisë i duhet datë për negociata me BE-në

Është e nevojshme që Bashkimi Evropian të caktojë një datë për konferencën e parë ndërqeveritare pa vonesë, e cila do të shënojë fillimin e negociatave për anëtarësim mes Maqedonisë së Veriut dhe Shqipërisë dhe është mirë që kjo të bëhet gjatë presidencës franceze të BE-së, tha sot kryetari i Kuvendit të Maqedonisë së Veriut.

Talat Xhaferi me këtë mesazh sot nisi fjalimin e tij në Konferencën e 18-të të Nismës Adriatiko-Joniane me temë “Integrimi Europian: Ballkani Perëndimor, Vlera e Shtuar e Rajonit Adriatiko-Jonian dhe Bashkimi Europian”, mbajtur në kryeqytetin shqiptar, Tiranë.

“Edhe pse çdo vend ka strategjinë e tij dhe ndërmerr hapat e nevojshëm për të mbrojtur integritetin dhe sovranitetin e tij territorial, përgjegjësia e secilit vend veç e veç është përgjegjësi për stabilitetin e rajonit dhe integrimin e tij evropian. Për Republikën e Maqedonisë së Veriut, anëtarësimi në NATO do të thotë të jesh pjesë e përpjekjes për të ruajtur paqen dhe natyrisht fakti që jemi bashkë nën atë ombrellë të përbashkët, rrënjoset një ndjenjë fuqie dhe sigurie dhe në të njëjtën kohë ka një ndikim shumë pozitiv në të gjithë rajonin dhe më gjerë, tha Xhaferi.

Për ne si vende aspirante, potencoi Xhaferi, është shumë e rëndësishme në kuadër të Iniciativës “Adriatiko-Joniane” që të intensifikohet bashkëpunimi mes parlamenteve dhe organeve parlamentare për reformat tona dhe në të njëjtën kohë të jemi në gjendje të artikulojmë interesat dhe çështjet tona, ndonjëherë edhe dilemat, në Parlamenti Evropian, por edhe para institucioneve të tjera të Bashkimit Evropian.