Majori ukrainas thotë se në Mariupol askush nuk i ka dorëzuar armët, por thekson se ky mund të jetë mesazhi i fundit

Komandanti i ushtrisë ukrainase në qytetin port Mariupol, ka thënë se forcat e vendit të tij që janë stacionuar në fabrikën e çelikut Azovstal, “nuk do të ulin armët” dhe se do të vazhdojnë të luftojnë kundër forcave ruse, shkruan Washington Post.

Majori Serhiy Volyna nga brigada e 36-të, i ka thënë kësaj të përditshme se ushtarët ukrainas do të vazhdojnë të “zhvillojnë operacionet ushtarake për të përmbushur detyrat të cilat u janë dhënë”, transmeton Telegrafi.

Në videon e dërguar Washington Postit, ky komandant gjithashtu i ka kërkuar liderëve botërorë që t’i ndihmojnë të sigurojnë një largim të sigurtë për civilët në Mariupol.

Lexo po ashtu Rusia e “gatshme” për armëpushim në Mariupol, nëse ukrainasit i dorëzojnë armët

“Kjo është adresa jonë për botën. Ky do të mund të ishte mesazhi i fundit. Mund të kemi ndoshta edhe pak ditë apo orë. Forcat e armikut janë dhjetëra herë më të mëdha sesa tonat. Ata kontrollojnë hapësirën ajrore, artileri e në tokë”, shtoi Volyna.

Majori ukrainas ka theksuar se “janë duke mbrojtur një kompleks brenda fabrikës së çelikut ku ka të strehuar mjaft civilë”.

“Po i adresohemi liderëve botërorë që të na ndihmojmë. Po u kërkojmë procedura të përshpejtuara. Në Mariupol janë mbi 500 ushtarë të plagosur dhe mijëra civilë – përfshirë gra e fëmijë. /Telegrafi/