Uran Ismaili dorëzon në KQZ kandidaturën për kryetar të kryeqytetit

Kandidatit i Partisë Demokratike të Kosovës për kryetar të Prishtinës, Uran Ismaili ka dorëzuar në Komisionin Qendror të Zgjedhjeve edhe zyrtarisht kandidaturën për kryetar të kryeqytetit.

Kështu ka bërë të ditur Ismaili përmes një postimi në Facebook.

“Para pak minutash e dorëzova kandidaturën time zyrtare në KQZ për Kryetar të qytetit tonë të dashur, Prishtinës. Së pari, dua t’i falënderoj të gjithë qytetarët e Prishtinës të cilët e kanë mbështetë kandidaturën time. Javët e fundit, përveç inkurajimit të madh, unë kam pranuar edhe shumë informata, ide, por më e rëndësishmja edhe shumë respekt, dashni e energji pozitive nga qytetarët e Prishtinës”, shkruan Ismaili.

Ai shtoi tutje se, “Bujtjet, intervenimet nëpër lagje, diskutimi me qytetarët në çdo lagje, më kanë bërë me kuptu dhe më kanë siguru që bashkimi rreth Prishtinës është gjëja më e rëndësishme që duhet të bëjmë për ta transformu qytetin tonë”.

“Sepse për shumë vite me radhë, Prishtina ka qenë e ndarë për interesa financiare dhe politike. Prishtina është trajtu si bastion partiak. Dhe kjo është diçka që duhet ta ndryshojmë, fundamentalisht. Me kandidaturën time dua të dërgoj mesazh të qartë se unë dua të jem kryetar i Prishtinës për të gjithë qytetarët e Prishtinës, pa dallim. Për këtë arsye kam zgjedhë që mesazhi ynë të jetë “Prishtina na bashkon”. Bashkimi, jo ndarja, është rruga jonë. Rruga që edhe unë e kam zgjedhur për Prishtinën”, theksoi Ismaili. /Telegrafi/